Luzemetraia dokumentala: La Gran Mancha

La Gran Mancha lanak itsasoko hidrokarburoek eragindako kutsaduraren aurkako borrokaren historian mugarri izan zen balentria bati buruzko istorio ezezagun eta isildua berreskuratzen du.

Prestige ontzia Costa da Morteren parean hondoratzeak fuelaren aurrekaririk gabeko hedapena eragin zuen. Lehen aldiz, lehentasuna itsasoan bertan jarduteari eman zitzaion, fuela lehorrera iritsi aurretik neutralizatzeko, Bizkaiko Golkoaren barruan zabaldutako aparteko operatibo baten bidez.

Dokumentalak 1.000 euskal arrantzale baino gehiagoren istorioa du ardatz. Eusko Jaurlaritzaren koordinaziopean, hegaluzearen arrantzarako ohiko teknikak egokitu zituzten, itsaso zabalean chapapotea biltzeko.

Memoria eta dibulgazioko ikus-entzunezko proiektua da, konpromisoaren, berrikuntzaren eta elkartasunaren istorio bat berreskuratzen duena. Halaber, Espainiako hiru autonomia-erkidegotako kostaldeak eta Frantziako Atlantikoko kostaldearen zati handi bat babesten lagundu zuen operazio baten balioa nabarmentzen du.